Ҫакнашкал пулӑшу уйрӑмӗсем ӗҫлеме пуҫланӑранпа 5 уйӑх ҫеҫ иртнӗ пулин те, ҫемьесем хушшинче вӗсем ырӑ ят ҫӗнсе илме ӗлкӗрнӗ. Ачасене вӑхӑтлӑх хӑвармалли ушкӑнпа хальлӗхе 100 яхӑн йыш усӑ курнӑ. Кунта ҫулталӑкран пуҫласа 4 ҫулчченхи пепкесене йышӑнаҫҫӗ. Вӗсене эрнере икӗ хутччен 3 сехет таран хӑварма пулать. Ачасемпе педагог-психолог ӗҫлет: шӑпӑрлансене выляттарать, тӗрлӗ хӑнӑхтару тума вӗрентет. Ҫакӑн валли хатӗрсемпе теттесем ҫителӗклӗ. Ҫавӑн пекех специалиста ача патне киле те чӗнме май пур.
Дмитрийпа Яна Вараксинсен хӗрӗ Даяна 2 ҫул та 5 уйӑхра. Хӗр пӗрчи ку ушкӑна хаваспах ҫӳрет. Педагог та уншӑн ҫывӑх ҫын пулса танӑ. Ҫамрӑксемшӗн ачана вӑхӑтлӑх шанса хӑвармалли вырӑн пурри питӗ пӗлтерӗшлӗ.
Шупашкарти Щекуринсем - нумай ачаллӑ ҫемье. Вӗсем виҫӗ ывӑл ҫитӗнтереҫҫӗ. Кӗҫенни Павел ҫулталӑк ҫурӑра анчах. Ача япалисен прокачӗ пирки пӗлсен вӗсем ҫак ҫӑмӑллӑхпа усӑ курма шут тытнӑ. Ку пунктра 3 ҫулчченхи ачасем валли вӑхӑтлӑх тӗрлӗ япала илме пулать. Вӑл шутра: кӳме, автокреслӑ, ҫунашка, теттесем тата ытти те. Хальлӗхе ку пулӑшупа 119 ҫемье усӑ курнӑ.
Кӑҫал республикӑри халӑха социаллӑ пулӑшу паракан 10 учрежденире ачана вӑхӑтлӑх хӑвармалли ушкӑнсем тата прокат пункчӗсем уҫӑлнӑ. Вӗсенчен 4-шӗ Шупашкар хулинче вырнаҫнӑ.
Оксана Верликова, Виктор Степанов
