Атайкассинче пин те 500 ытла ҫын пурӑнать. 110 вырӑнлӑ садике 105 ача ҫӳрет. 2020-мӗш ҫулта хута янӑ учрежденире ҫитӗнекен ӑрӑва тӗрлӗ енлӗ аталантарма майсем туса панӑ. 2 ҫул каялла кунта агролаборатори уҫнӑ. Ҫӗр ӗҫӗпе кӑсӑклансах аппаланаҫҫӗ пӗчӗккисем. Республикипе паянхи кун тӗлне ҫакнашкал 137 агролаборатори хута янӑ. "Вӗренӳ" наци проекчӗпе килӗшӳллӗн ялти вӑтам шкула та 2023-мӗш ҫулта тӗпрен юсанӑ. Кӑҫал республика тата муниципалитет бюджетӗнчи укҫа-тенкӗпе пӗлӳ ҫурчӗн таврашне хӑтлӑх кӳнӗ. Халӗ ял шкулӗн сӑн-сӑпачӗ хуларинчен пӗрре те кая мар.
Атайкассисен тепӗр юратнӑ вырӑнӗ - стадион. Халӑх унта баскетболла, волейболла выляма пуҫтарӑнать. Чупмалли ҫулсем, тренажерсем пур. Мини-футбол вӑййине кӑмӑллакансем те кунтах килеҫҫӗ. Ялта фельдшерпа акушер пункчӗ те хӑпартма пуҫланӑ. Медицина пулӑшӑвӗпе кунта пин те 800-е яхӑн ҫынна тивӗҫтерӗҫ. Вӑл шутра кӳршӗ ялсене те. Республика Пуҫлӑхӗ Олег Николаев атайкассисене тепӗр хыпарпа савӑнтарчӗ - ҫитес ҫулсенче кунта ҫӗнӗ Культура ҫурчӗ тума палӑртнӑ.
Алиса Александрова, Павел Иритков
