1920-мӗш ҫулхи чӳк уйӑхӗнче иртнӗ Советсен 2-мӗш съезчӗ йышӑннипе уҫӑлнӑ СССР халӑхӗсен патшалӑх издательстви ҫумӗнчи пирӗн уйрӑм. Унӑн тӗп тӗллевӗ чӑвашла кӗнекесем кӑларасси пулнӑ. Халӗ кунта кӑларӑмсем икӗ-виҫӗ чӗлхепе тухаҫҫӗ. Ҫыравҫӑ, ӳнерҫӗ, редактор, типографи ӗҫченӗ - ҫак тачӑ ҫыхӑнура ҫуралса вулакан патне ҫитет кирек мӗнле кӗнеке те. Чӑваш кӗнеке издательстви вӑхӑт таппине туйса аталанать, яланах тӗрлӗ ӑмӑртура мала тухать, ҫав вӑхӑтрах 105 ҫул каялла ҫул уҫакансем пуҫарнӑ йӑла-йӗркене те асра тытать.
1970-1980-мӗш ҫулсенче издательство пур енӗпе те ҫӳллӗ шая аталанса ҫитнӗ: ҫулталӑкра 300 тӗрлӗ кӗнеке тухнӑ. Хӑшпӗр чӑваш романӗсем 30 пин тиражпа вулакан хушшинче саланнӑ. "Улӑп ҫӗрӗ", "Атӑл тӑрӑхӗ" йышши ярӑмсене ҫӗршыв пӗлнӗ. Чи пысӑк сӑмах ӑстисем кунта ӗҫленӗ. Паян та издательство лаҫҫи ҫыравҫӑсен ҫамрӑк ӑрӑвне ҫитӗнтерсе пырать.
Тепӗр пултаруллӑ та тӑрӑшуллӑ ҫамрӑк редактор - Ольга Иванова, хӑйӗн хайлавӗсене вӑл Австрийская хушма ятпа кӑларать. Вӑл та студент чухнех ҫырас ӗҫе кӳлӗннӗ, алла диплом илсенех издательствӑна корректора вырнаҫнӑ.
Юлашки 5 ҫула илсен, Чӑваш кӗнеке издательстви 16 пин те 509 тӗрлӗ литература кӑларнӑ, вӗсен пӗтӗмӗшле тиражӗ - 132 миллион ытла. Республикӑри тӗп библиотекӑсем - ҫӗнӗ кӗнеке тухасса кӗтсе тӑракансем, вулакансем кӑларӑмсене мӗнле йышӑнасси вӗсенчен килет. Пирӗн телерадиокомпани те издательствӑпа яланах таччӑн ҫыхӑнса ӗҫленӗ.
Ҫулсерен хатӗрлекен план тӑрӑх, хальхи вӑхӑтра тӗрлӗ тематикӑпа 40 тӗслӗ кӗнеке тухса тӑрать. Кунсӑр пуҫне хушма саккассене те йышӑнаҫҫӗ. Уйрӑмах ачасем валли кӑларакан хайлавсене пысӑк тимлӗхпе хатӗрлени паха. Ҫыравҫӑсене хавхалантарас тесе "Чӑваш романӗ" ӑмӑрту ирттерни те савӑнтарать.
Вулакан пулсан кӗнеке тухать, кӗнеке пулсан вулакан тупӑнать, ҫак ылтӑн вӑчӑра ан татӑлтӑрччӗ. Чӑваш кӗнеке издательстви малашне те ҫивӗч калем туптакан сунтал вырӑнӗнче пултӑр.
Марина Карягина, Виктор Степанов
