Ырӑ пулӑм Анатолий Абрамовӑн ӗҫтешӗсене, юлташӗсемпе тӑванӗсене, вӑл вӗрентнӗ студентсене пуҫтарчӗ. Анатолий Серафимович Йӗпреҫ тӑрӑхӗнчи Кӗлӗмкассинче ҫуралса ӳснӗ. Ульянов ячӗллӗ Чӑваш патшалӑх университетӗнчен вӗренсе тухнӑ хыҫҫӑн "Ҫӗнтерӳшӗн" район хаҫатӗнче, "Ульяновец", "Хыпар", "Тантӑш" хаҫатсенче тата "Халӑх шкулӗ" журналта корреспондентра тата фотокорреспондентра ӗҫленӗ. Чылай вӑхӑт Чӑваш патшалӑх университечӗн журналистикӑпа стилистика кафедрин аслӑ преподавателӗ пулнӑ.
Тӗл пулӑва пухӑннисем Анатолий Абрамов вӗренӳ тата ӳнер енӗпе пӗр пек ӑста пулнине палӑртрӗҫ. "Хыпар" издательство ҫурчӗн директорӗ - тӗп редакторӗ Виктория Вышинская Анатолий Абрамовӑн журналистикӑри ҫитенӗвӗсене аса илчӗ. Куравра маҫтӑрӑн чи лайӑх ӗҫӗсене тӑратнӑ. Кашни ӳкерчӗк - хай истори. Кунта ҫут ҫанталӑк илемлӗхӗ, пурнӑҫри самантсем, ҫын туйӑмӗсем.
Анатолий Серафимович нумай кӗнеке валли сӑн ӳкерчӗксем тунӑ, ятарлӑ альбомсем хатӗрленӗ. Ҫавӑн пекех мӑшӑрне - Галина Абрамовӑна чӑваш чӗлхи учебникӗсене кӑларма пулӑшнӑ. Анатолий Абрамов Раҫҫей журналисчӗсен союзӗн пайташӗ, Ҫемен Элкер ячӗллӗ преми лауреачӗ.
"Анатолий Абрамовӑн илемлӗх тӗнчи" фотокурав Наци библиотекинче авӑн уйӑхӗччен ӗҫлет.
Диана Иванова, Алиса Александрова, Святослав Петров, Зоя Яковлева
