Ӑмӑртӑва 23 регионтан 200 ытла спортсмен хутшӑнчӗ. Вӗсем икӗ ӳсӗм ушкӑнӗнче тата тӗрлӗ виҫе категорийӗсенче тупӑшрӗҫ. Чӑваш Республикин ушкӑнӗ чи йышли пулчӗ. Вӑл шутра ят-сум ҫӗнсе илнӗ спортсмен чылай. Хальхинче те вӗсем ята ямарӗҫ. 50 килоллӑ виҫе категорийӗнче тӗнче первенствинче ҫӗнтернӗ Виктория Ильина ылтӑн медале тивӗҫрӗ. Хӗрача Шупашкар тӑрӑхӗнчи Янӑш шкулӗнчи 10-мӗш класра пӗлӳ илет.
Виктория тантӑшӗ Юлия Ефимова турнирӑн кӗмӗл медальне ҫӗнсе илчӗ. Раҫҫей чемпионачӗн призерӗ Николай Ушаков инженер-конструктор та пъедесталӑн иккӗмӗш картлашки ҫине хӑпарчӗ. Пирӗн ентеш финалта 80 килоллӑ виҫе категорийӗнче Ямалпа Ненец автономи округӗнчен ҫитнӗ Георгий Салиндерпа тӗл пулчӗ. Сӑмах май, Ямал команди иккӗмӗш вырӑн йышӑнчӗ. "Атӑлҫи Кубокне" Чӑваш Ен ушкӑнӗ ҫӗнсе илчӗ. Пирӗн спортсменсен 47 медаль, 14-шӗ - ылтӑн. Виҫҫӗмӗш вырӑна Пенза облаҫӗ тухрӗ.
Екатерина Фомина, Вячеслав Ильин
